Jólatónleikar Stöku 15. desember
Þriðjudaginn 15. desember heldur kammerkórinn Staka jólatónleika í Apostelkirken í Kaupmannahöfn.
Staka er blandaður íslenskur kammerkór sem starfar í Kaupmannahöfn. Kórinn er með aðstöðu í Jónshúsi og æfir þar alla þriðjudaga. Kórinn var stofnaður haustið 2004. Staka hefur komið fram á ýmsum tónleikum og uppákomum við góðar undirtektir. Fastir liðir í kórstarfinu eru þátttaka í kóramóti íslenskra kóra erlendis og kóramótum íslenskra, færeyskra og grænlenskra kóra í Kaupmannahöfn (NAK).
Kórmeðlimir Stöku eru að jafnaði um 16 íslenskir söngvarar sem flestir hafa sungið í kórum frá blautu barnsbeini. Margir hafa einhverja söng- eða tónlistarmenntun sér að baki. Verkefnaval Stöku er mjög fjölbreytilegt þó með megináherslu á nýlega tónlist. Það er eitt af markmiðum Stöku að kynna íslenska tónlistarmenningu í Danmörku.