Umsóknir um dvöl í íbúð fræðimanns í Kaupmannahöfn 2014-2015
Íbúð fræðimanns í Kaupmannahöfn samkvæmt reglum um hús Jóns Sigurðssonar er laus til afnota tímabilið 27. ágúst 2014 til 25. ágúst 2015.
Fræðimenn, sem hyggjast stunda rannsóknir eða vinna að verkefnum í Kaupmannahöfn, geta sótt um afnot af íbúðinni, sem er á 2. hæð Jónshúss. Íbúðin er tveggja herbergja (u.þ.b.70 fermetrar) og fylgir henni allur nauðsynlegasti heimilisbúnaður. Afnotin eru endurgjaldslaus, en þeim sem fá úthlutað ber þó að greiða fyrir þrif íbúðarinnar og rekstrarkostnað, alls kr. 45.000.
Dvalartími í íbúðinni fer eftir umfangi verkefnis og öðrum atvikum, en er þó að venjulega ekki lengri en tveir mánuðir. Úthlutunarnefnd ætlast til að dvalargestir nýti úthlutaðan tíma sinn að fullu við störf í Kaupmannahöfn.
Við úthlutun íbúðarinnar er höfð hliðsjón af eftirfarandi atriðum:
1. Að umsókn sé vandlega unnin.
2. Að verkefnið verði ekki unnið annars staðar en í Kaupmannahöfn eða nágrenni.
3. Að verkefnið hafi fræðilegt eða hagnýtt gildi og þyki áhugavert.
4. Að sem eðlilegust skipting sé milli kynja og fræðigreina.
Þeir sem eru í námi, þar á meðal doktorsnámi, eiga að jafnaði litla möguleika á úthlutun. Þá er höfð hliðsjón af því hvort sótt er um dvöl í fyrsta skipti, en þegar umsækjendur eru jafnsettir skulu þeir ganga fyrir sem sækja um dvöl í fyrsta skipti. Úthlutunarnefnd ráðgerir að ljúka störfum í júní.
Umsóknir um íbúðina skulu vera á sérstöku formi (umsóknareyðublað má nálgast með því að smella hér) og skulu berast skrifstofu Alþingis eigi síðar en mánudaginn 19. maí nk. Umsóknir merkist:
Umsókn um fræðimannsíbúð
b.t. Jörundur Kristjánsson
Skrifstofu Alþingis
150 Reykjavík
Rétt er að vekja athygli umsækjenda á að ráðgert er að innrétta aðra fræðimannsíbúð á 4. hæð Jónshúss, sambærilega þeirri sem nú er til ráðstöfunar. Verður hún auglýst sérstaklega fyrir lok októbermánaðar og mun úthlutunartímabil miðast við almanaksárið.